كلنا يعرف ذاك المثل القديم اللي يقول :
(( الحي يحييك .. والميت يزيدك غبن ))
في هالقصيدة المتواضعة حاولت أن أرسم هذا المثل على لوحة من الحزن ,,
وإن شاءالله تعجبكم ,,
أقول :
ياويل قلبي كل مااشتقت لقياه ,,
وشلون ماتشتاق عيني لعينه ,,
أنا أدري إني حيل أحبه وأهواه ,,
وأنا أدري إن القلب صار بيدينه ,,
أموت أنا به في غيابه وأحياه ,,
وشلون أجل لو صافحتني يمينه ,,
حاولت أنا اكتم عبرتي يوم فرقاه ,,
وألملم جروح الزمان الطعينه ,,
واعطيه من قلب المعنّى معاناه ,,
وآخذ من جروحه ولو هي دفينه ,,
وأضيع به في زحمة الناس وأنساه ,,
وأنسى معه ذكرى السنين وحنينه ,,
لقيت نفسي كل ما حل طرياه ,,
عروق قلبي كلها تقول : وينه ,,
يامر على قلبي ولا شك ينهاه ,,
كلي أنا تحت الإشارة رهينة ,,
القلب شرّع بابه وحي من جاه ,,
والعين تبكي دمعها مستكينه ,,
ما كل من يضحك سعيد بدنياه ,,
وما كل من يبكي دموعه حزينه ,,
أحدن بكى .. والكل يدري عن بكاه ,,
وحدن مع الضحكه تحس بونينه ,,
ياشين فرقى الحب وياشين بلواه ,,
والمشكلة دنيا بلا حب .. شينه ,,
والزين ما يكمل ولو كان ماحلاه ,,
إلا حبيبي مــا تغــيـر بزينــه ,,
ماجيت أسولف عن حلاه ومزاياه ,,
يكفي أحاسيسي وقلبي عارفينه ,,
الشعر يعجز وصفها في قفاياه ,,
لكنها بعيني تساوي كل زينه ,,
كن الفضا في غيبته ضاق مسعاه ,,
وكني غريقٍ ينتظر له سفينه ,,
شف دنيتي ياصاحبي عقب فرقاه ,,
مثل الغريب اللي سكن بالمدينة ,,
ماباقي من أيامنا غير ذكراه ,,
من عقب لحظات الوداع الحزينة ,,
باكتبه أنا في صفحة الشعر واقراه ,,
وباذبحه بزود الغلا دون سكينة ,,
وبارسمَه في لوحة الشعر وانعاه ,,
وبادفنَه بين الضلوع الحنينه ,,
بوسط الحشا في داخل الصدر مثواه ,,
إما يسار القلب وإلا يمينه ,,
(( صحيح إن الحي يعطيك الحياة
مير البلا حيٍ وزادك غبينه ))
وسلامتكم ,,,,,
أتمنى آرائكم وفي المقام الأول إنتقاداتكم قبل أي شئ آخر ,,
وتقبلوا أولى مشاركاتي بينكم ,,
وشكراً لكم ,,

°ˆ~*¤®§(*§*)§®¤*~ˆ°مخاوي حزن°ˆ~*¤®§(*§*)§®¤*~ˆ°
صدق من قال انك شاعر

الله يعطيك الف عافية على هذة القصيدة الرائعة
ننتظر بوح قلمك من جديد


تقبل مروري
انين الماضي