شموخه حبيبتي والله ماعاد فيني صبر بلييييييييييييييز فديتك كمليها

بومنصور : بكره ان شاء الله الخطوبه واعزموا من تحبون ...

بو مفر : ان شاء الله والعرس بعد شهر لان الولد مستعجل

مسفر : ايوه ياعمي ...

بو منصور : ان شاء الله تم ...

طلعوا كلهم ومابفى الا منصور ومسفر ....

مسفر : وينها ..؟

منصور : خلاص لبكره الخطوبه

مسفر يدق عليها : والله صبرت شهور علشان تقولي اخرتها لبكره

&


دق جوال لوجين

لوجين: مسوسي دق

البندري: يووووووووه كنا بروديي و بدوي صرنا بمسوس ي

لوجين ترد : هلا وغلا هلا بمسوسي

مسفر : ههههه هلا فيك على البركه واخيييييرا يالوجين واخير

لوجين: ههههه الله يبارك فيك ..

مسفر : بسرعه انزلي مشتاق لك ..

لوجين: طيرررررران

تركتهم ونزلت

مريم: هههههه الله يهنيها وعقبالكم يابنات

نواره وذوق ناظروا بعض كل وحده ماتبغى تتزوج الا اللي تتمناه ...

&

لوجين بدلع : مسوسي مبروك

مسفر : الله يبارك فيك عقبالك

لوجين: هههههه حلوه لاتعيدها

مسفر : اليوم احلى يوم بحياتي ياحياتي ياقلبي ياعمري

لوجين: ههههههه

منصور : احم احم

لوجين: اوه منصور نعم بغيت شي

منصور : مبروك يابنت عمي

لوجين: تسلم ..عقبالك

منصور : ان شاء الله ... يله اتركم مع بعض ابروح انااااااااااااااااام ..

مسفر : الله معاك

منصور : تبغونها من الله

مسفر : ههههههههه

لوجين: الحمدلله فهمتها ..

منصور طلع وهو مرتاح الضمير اللي راح علشانه نفذه خلاص يقدر ينام هاللحين ...

%%%%%%%%%%%%%%%%%%%%%%%%%%%%%%%

بدر يدق على الجوري وهي جالسه سوالف ومندمجه

على جنب
نواره: جور جوالك يدق

الجوري: طنشيه ..

نواره : يمكن بدر

الجوري: لا انا عارفه مين طنشي

نواره: بدر صح

الجوري: نواره وش فيك اليوم مثل العجوز الحنانه

نواره : بدر طيوب وحبوب وشكله يحبك انتبهي لاتضيعينه من ايدك مثلي غبيه

الجوري كانت محتاجه مثل هالحكي لانها متردده ..

نواره: والله لو يرجع الزمن لورى شوي كان ماتركت طلال دقيقه ..قبل لاينساني

الجوري: يعني احاكيه ...

نواره: اكيد م

البندري ترمي المخده الصغيره : وش عندكم اسرار

نواره والجوري: هههه مالك دخل

البندري تقوم لهم : لا انتم طايحين على شي

مريم: خليهم جاين مع بعض داقينها صحبه

البندري: لامو علي

ام ذوق : هههه ايوه مو على زوجة ولدي الغاليه

مريم: اذا كذا مانقدر خلاص احكولها يابنات ..

نواره: والله لو تموتين اجل هذا وانا اخر من يعلم

البندري غضت شفايفها : اسكتي

نواره: تهبلين بكل شي يا ..هههههههه

البندري: كلي تبن

الجوري وذوق : ههههههههه

نوره ام عبدالرحمن : وش فيكم فهمونا

الجوري: مافي شي بس يستهبلون ...

مريم : الا يابنات بكره من وين لكم فساتين

نواره: من لوجين تقول عندها فستان لكل وحده هديه اشترته مع مسفر قبل لاتنت ... – سكتت -


ام البندري: متى مع مسفر هي شافته من قبل

البنات ناظروها ودهم يذبحوها

ذوق : قبل لانجي وكان معهم منصور .. انتي عارفه ياخالتي لوجين يتيمه ومالها الا عمامها ...

مريم : الله يوفقها ويستر عليها البنت هذي طيبه

نواره : اكيد هذي لجون – قربت من اذن الجوري وهمست لها – يله دقي عليه ...

البندري جلست بالنص : وش قلتيلها

نواره همست باذنها : يام راشد اعقلي

البندري : انقلعي ...

الجوري خذت جوالها وراحت لغرفتها اللي ببيت لوجين لانها حاطه لكل وحده غرفه ... قفلت الباب .. وجلست تناظر الجوال بالظلام تدق والا لا .. فجاءه دق .. قفزت وقلبها يرجف (( بدر يتصل بك )) ... ارد والا لا ...

من جهة ثانيه كان بدر جالس بالقهوه مع الشباب يحاول ترد عليه ومافيه امل كان مو معهم متضايق مره ... دق وهو ياس من ردها فجاءه سمع صوتها الناعم : الو

بدر بلهفه : الو الجوري ....

الجوري : ايوه نعم ..

بدر : ابمرك هاللحين اطلعي ..

الجوري : لا الوقت متاخر ومايصير ادخل بيتكم هذا الوقت

بدر : هو بيتك بعد .. تجهزي بمرك في كلام كثير بحكيه لك ..

الجوري : قول اسمع انا رجعه معك اسفه ..

بدر : ابغى اعرف ليه فجاءه تغيرتي وش قالت لك دانا الزفت ..

الجوري: يعنيي تعترف انك تعرف دانا ...

بدر : قلتلك حكي كثير لازم تعرفيه وماينفع بالتلفون ..

اندق الباب نوره ام عبدالرحمن : يله مشينا يالجوري

الجوري: انتم روحوا انا ببات عند لوجين

ام عبدالرحمن : لا مايصير بدر يفكرك عندنا

بدر كان يسمعهم : ايوه لاتنامي الا ببيت عمك لوجين عندها ولد عمها ماينفع

الجوري: خلاص نوره انا بحكي معه

نوره: زين يله مع السلامه اشووفك بكره ..

بدر : قولي لها تنتظر وروحي معها ..

الجورري: لا بجلس مع صحباتي ولا تخاف مافيه رجال بالبيت ..

بدر وقف لعند سيارته : اوكيه يله باي

سكر من غير لايسمع ردها .. انقهرت منه ..
رمت الجوال وطلعت ترقص وتنبسط وهو مثل ماسكر بوجهها بتطنشه ..

نواره تصفق لذوق اللي ترقص مصري : عاشوا عاشت ...

ام البندري: الجوري ارقصي معها

الجوري : بس ماطلبتي يالغاليه ياجدة الغالي

مريم : تسلمين – على بالها مشاري ولدها –

ذوق والجوري يرقصون على (( وحده وحده )) و فالينها ..

البندري جلست بجنب امها ومسكت ايدها وحطت راسها على كتفها امها استغربت وكان حد كات عليها مويه بارده : وحشتيني يمه

ام البندري غرقت عيونها : وانتي اكثر ..

مريم ابتسمت ....

ام ذوق : ذوق يله ابوك يقول يله

ذوق : مع بابا لا ماني براكبه ببات هنا

ام ذوق : لاحول ولاقوة الا بالله

مريم : اطلعي يابنت عيب

ذوق وقفت رقص : ترى والله بدخل هاللحين ولا عاد اجلس معكم سكروا الموضوع ..

البندري تناظر بعيون امها وبهمس : غبيه ماحست بقيمة الوالدين ..

ام البندري : مصيرها بتعرف يا امي ويا حبيبتي ..

مريم : يمه يله طلع اسمنا محمد دق

ام البندري : يمه البندري تعالي معنا

البندري : ان شاء الله

اندق جرس الباب ..

ام ذوق : اكيد هذا سندار .. يله ذوق

ذوق : سندار على بالي انو بابا

الشغاله : وين هذا الجوري ..

الجوري : نعم

الشغاله : في واهد بره يقول يبي الجوري

الجوري : واحد مين

ام ذوق : اكيد انه بدر ..

الجوري : اوكيه بنزله هاللحين (( على باله بحركته هذي بيحرجني بس والله لاتشوف اذا ماوريتك ))

البندري واهلها طلعوا للبيت وذوق واهلها بعد طلعوا .. بقي لوجين ومسفر في المجلس سواليف .. والجوري نزلت لبدر ونواره دخلت غرفتها تنام ...

الجوري : نعم مو انا

بدر مسكها من ايدها بقوه : تعالي معي

الجوري سحبت ايدها : مابغى وطلقني

بدر ناظرها وهو ساكت .. اطلقك وانا كل نبض بقلبي يتبض باسمك

الجوري خافت من نظرته : بدر خلاص ليه نضحك على بعض م

بدر سحبها من ايدها لاقرب كنبه : تعالي ابفهمك كل شي ..

الجوري بقلة حيله جلست ..

بدر : اسمعي اماني هذي اللي على بالك صاحبتك هي نفسها دانا ..

الجوري تنرفزت : رجع وقال دانا

بدر بعصبيه : اسمعيني للاخر .. لو تذكري الصور وتسجيل الفديو اللي كان معي وفيه انتي .. ورقمك وغيره من اخبارك وانتي وين واجي لعندك ... اكيد تسالي من وين صح ... .؟

الجوري نزلت دموعها : سالت نفسي كثير .. وما

بدر قاطعها : من هذي اللي اسمها اماني .. هي نفسها دانا ...كانت خويتي من قبل

الجوري : اماني .؟؟؟؟؟؟؟؟؟؟؟؟؟

بدر : ايوه اماني .. كذبت عليك حتى باسمها وكانت تجيب لي اخبارك اول باول واذا مانتي مصدقتني اسالي طلال .... ومن غير لاتساليه ابسالك وش معنا بعد الحادث قطعت صلتها فيك ولا حكت معك ..

الجوري: لا حكت قبل امس

بدر : لانها عرفت اني تزوجتك من مروان واحد من الربع .. ونط عندها عرق الغيره منك .. لانها ماتحبك

الجوري شهقت بالبكي : ليه وش سويت لها

بدر : ماسويتي شي انا السبب من البدايه

الجوري دفته : انت السبب بكل شي . اكرهك يابدر اكثر من اي فتره مضت ...

بدر وقف : تكفين الجوري خلاص تعبت وانا اسمعها .. متى بتحسي متى ..؟ - عصب مره سحبها من ايدها بقوه – تعالي معي عجبك والا كيفك ..

الجوري : اتركني ماني بر

بدر سحبها بقوه : الجوري تعالي معي بالطيب ازين لك ولي ..

الجوري خافت : اجيب العبايه طيب

بدر وشياطين الدنيا تقفز بوجهه : يلللللله

الجوري ركضت لفوق تجيب العبايه ...

نواره كانت جالسه بالصاله تناظر مسلسل اسوار ... : تعالي الجور مسلسل جناااااااان جرياء و

انتبهت بدموع الجوري راحت لها بسرعه : جواره وش فيك ..؟

الجوري : عبايتي ابغى العبايه ..

نواره : وش فيه بدر فيه شي رنده ورناد صاير لهم شي

الجوري: لا – ضمت نواره – يله باي .. سلمي على الجوري

نواره بعدت عنها معصبه : وجع ان شاء الله كانك تودعين انطقي وش فيه

الجوري ترتجف : مابغاه مابغى اروح معه معصب والله خايفه

نواره : خايفه ليه انتي وش مسويه

بدر يصرخ : الجووووووري

الجوري لبست العبايه : باخذ عبايتك اوكيه

نواره : اوكيه ..؟؟؟؟؟؟؟؟؟؟؟؟؟

نزلت الجوري بسرعه

بدر : يله قدامي ...

مشت الجوري ساكته وهي ترتجف ..

عند السياره

بدر : غطي شعرك

الجوري من خوفها غطت وجهها كله ...

%%%%%%%%%%%%%%%%%%%%%%%%%%%%%

البندري دخلت للبيت ولحقت امها لغرفتها .: يمه يمه

ام البندري مبتسمه : هلا يمه بنو ..

البندري سكرت الباب : ممكن احكي معك شوي

ام البندري : اكيد ياقلبي من عيوني

البندري جلست على السرير ..: يمه العبي بشعري مثل قبل يوم انا صغيره

ام البندري جلست بجنبها واشرت على فخذها : تعالي يمه حطي راسك هنا ..

البندري طفت الانوار بس تركت نور الابجوره وتمددت : يمه ممكن اسالك سوال

ام البندري: اكيد ياحياتي تفضلي ..

البندري : لما حملتي بمحمد اخوي وش كان احساسك وهو اول طفل

ام البندري: يوووه وش اقولك انا وابوك كنا نموت ببعض وانبسطنا فيه .. وكنت احس اني اول مره لازم هتم بصحتي ونفسي علشانه ..

البندري : وابوي وش سوى ..

ام البندري تنهدت بضيق : كان طبعا غير عن ابوك اللي بعد ماولدت تهاني .. – ابتسمت – انبسط كثير وشرء ل الهدايا والالعاب وانا بالشهر الثالث

البندري جلست : يمه انتي تحبيني

ام البندري : والله انك اخر العنقود سكر معقود .. انتي حبيبتي انتي ..

البندري بدون مقدمات كذا فجاءه ضمة امها بقوه وبكت : يمه

ام البندري: يمه حبيبتي وش فيك ..

البندري دموع ها تجاوب عنها

ام البندري تضم بنتها وخايفه عليها : حياتي يمه بنيتي وشفيك ... توك حبوبه وش صار ...

البندري : يمه يمه ..

ام البندري شاب شعرها اكثر : يمه تكفين انطقي قوليلي وشفيك ..

البندري: رائد يمه رائد

ام البندري نزلت دموعها من خوفها على بنتها : وش فيه

البندري: يمه

ام البندري بكت لبكي بنتها : واللي يسلمك البندري لاتسوي بنفسك كذا

البندري : يمه انا حامل

ام البندري وكان حد صاب عليها مويه بارده : كيف ..؟

البندري: ..................

ام البندري تبعدها شوي : يمه بنتي حبيبتي فهميني حبه حبه

البندري تاشر على بطنها : يمه هنا ولد رائد يمه هنا قطعه من قلبي رائد .. يمه هنا ولد عزوتي وتاج راسي ... يمه ولد الغالي بحشاي ..

ام البندري : هو دخل عليك ...؟؟؟؟؟؟؟؟؟؟

البندري هزت راسها بضعف وضمت امها بقوه : يممممه
محتاجتلك يمه لاتتركيني

ام البندري ضمت بنتها من قلب هذا اللي كانت تتمناه تنرمي بنتها بحضنها وتقولها محتاجتلك بس ماتمنتها بهالظروف ... : بس يمه بس .. انا بجنبك ومعك ..

البندري بكت بحضن امها مثل الطفل كانت محتاجه هالحضن الدافي من زمان وهي حرمة نفسها منه ... : يمه رائد مادرى ماني عارفه وش اسوي .. مايرد علي انا خايفه عليه ....

ام البندري : الله كريم يابنتي الله كريم ..

نامت البندري بحضن امها بعد ماستفرقت كل دموعها فيه ..

غطت ام البندري بنتها وضلت تناظرها حرام طفله مو قد كل اللي عيال من هاللحين

ضلت تناظرها وتناظرها وهي تفكر بهذا الطفل وش راح تقول الناس جابت ولد من خطيبها ... هي وش ماخذه من كلام الناس ياما وياما قالوا عليها كلام وهي بالسجن وبعد ماطلعت منه ...
ضلت ضامه بنتها وهي نايمه بحضنها ....

%%%%%%%%%%%%%%%%%%%%%%%%%%%%%%%

بدر لحد ماوصلوا معصب : انزلي ...

الجوري نزلت وهي ساكته ..

رنده ورناد جالسين بحديقة البيت يلعبون الشيش ...

رنده : اوه جواره وصلت ...

رناد تفصخ غطى الراس : جوجوووووو

الجوري لفت عليهم وعيونها حمراء : هاي

رنده ورناد ركضوا لها : هاي

الجوري: كيفكم

رنده: ليه عيونك حمراء

رناد : ليه تبكين

الجوري بلعت ريقها : ملكت صديقتي اليوم

رناد: اها نواره

رنده : لا اكيد ذوق

الجوري : لا بنت راشد الكاسر لوجين اللي حكيت لكم عنها ..

رنده ورناد : لوجين الكاسر

الجوري: ايوه وتراكم بكره معزومين على خطوبتها ..

رنده ورناد : حنا

الجوري: كلكم حتى ام سعود ولمياء

رنده : ونااااسه

رناد : والله لاقول لكل صحباتي

بدر : ليه مو نايمين لهالحين ..؟

رنده : هههههه ينكت

رناد : شكله

بدر : احترمي نفسك انتي معها واحكوا كويس

رنده ورناد تجبسوا وتغيرت وجيهم

رنده : اجازه ماننام بدري

رناد : ماما عارفه ..

بدر ابتسم على اشكالهم الخايفه : اوكيه وين امي ..؟

رنده : كلهم داخل

رناد : الجور تعالي قولي لنا من اخذت وكيف ملكتها ..كشخه

الجوري توها بتنطق

بدر : الجور على قولتك تعبانه وبتنام .. وانتم دخلوا ناموا بدل الشيش اللي ماله داعي

رنده ورناد عفسوا بوجههم ومشوا يمسكون السيوف ويكملوا لعب ...

الجوري دعت ربها ماتشو ف احد بوجهها مالها خلق احد ...

ام سعود بشفايفها المنفوخه سلكون والشورت القصير : الحمدلله على السلامه يام حسام

الجوري دق قلبها بسرعه اكيد ام سعود بعد ماعرفت من ابراهيم كل شي بتستقل الفرصه وهذا بدايتها ام حسام ...
مسكت ايد بدر وصارت وراه تقريبا كانها تحتمي بجسمه من ام سعود : الله يسلمك ..


بدر استغرب من ردة فعلها ليه خايفه م ام سعود المسكينه صار عندها فوبيه من كل العايله ..

ام سعود : ها بدر تعشيتوا ..

بدر : لا .. ارسليه لنا فوق .. بالاذن

ام سعود: امك تحتريك مارضيت تنام الا لما ترجع ودام ان ام حسام الجوري معك اطلعوا لها مره وحده

الجوري شدت على ايد بدر : ومن قالك اني ام حسام

ام سعود : وش فيك تزمرين عادي طبيعي انك ام حسام لان بدر بسم الله عليه من صغره بو حسام

بدر : لا حنا العيال شايلينهم من القاموس – باس راس الجوري - نبغى نعيش شبابنا

ام سعود وجهها صار احمر من القهر قالت باستهزاء : والله مو بكيفك والا انت ودك ....

بدر : شقصدك

الجوري : يله بدر خالتي تنتظرك ..

بدر : اسمعي خلي الخدم يطلعوا العشاء لغرفتنا ... وكثري منه جواره جوعانه ماكلت شي من الصباح

ام سعود بدون نفس : طيب

بدر : وقولي لامي بمرها بكره هاللحين تعبان

الجوري مستغربه بدر يعامل ام سعود مثل الشغاله وهي ساكته وتسمع له ... معها حق بدر يخوف بلد ...

دخلوا للجناح .. الجوري قررت توقفه عند حده .. وهي من داخل ميته خوف ...: اسمع لاتضن اني رضيت اجي معك خلاص .. لا ياشاطر انا مالي رجعه معك لبريطانيا

بدر رفعها بين ايدينه ورماها على السرير يدغدغها : ليه معصبه طيب

الجوري :ههههههههههههههه
ههههههههههه – دمعت عيونها من الضحك – هههههههه خ .. خ..لا ..ص ..ههههههههه

بدر مبتسم : علشان تتادبي واذا قلتلك ترجعي ترجعي

الجوري: هههه ههههههه ب .. م ..و..ت هههه ... خ لا ص.. هههه

بدر : ماسمعت ..وش قلتي تموتين فيني

الجوري بتبكي من كثرت الضحك : ههههههههه ب.. د ..ر .. تك..ف..ى ى ...هههههه خ...لا ..ص ههههههههههه

بدر : قولي احبك واتركك

الجوري انصدمت : ههههههه ..

بدر زاد عليها : ها بتقولين والا كيف

الجوري : ههههههههه .. ا..ت..ر..ك..ن..ي ....هههههه ..وال..له ... ب . . ق ... و ... ل

بدر تركها وهي لحد هاللحين تضحك : ههههههه

بدر : يله انتي حلفتي قولي ......

الجوري ركضت : باحلامك ههههههه

بدر لحقها : باحلامي ها .. انا بوريك هاللحين ...

الجوري ركضت وطلعت بره الجناح الا بوجهها ام بدر اختفت ابتسامتها

بدر : ههههه تعالي ... يمه

ام بدر : مو راضي تمرني علشان تلعب مع زوجتك

بدر باحراج : لا يمه قلت امرك بكره احسن

تناظرللجوري : كيفك يابنتي ..؟

الجوري بلعت ريقها : الحمدلله ..

ام بدر : باكر ابغى اشوفك عندي من الصباح سمعت

بدر يبوس ايد امه : ابشري يالغلا انتي

الجوري دخلت بسرعه ووراها بدر

الجوري تفكر بصوت عالي وناسيه نفسها : يمه خفت شفتها بوجهي ..

بدر ضمها من ورى وهمس باذنها : جوارتي تجي ننسى كل شي

الجوري عرض ولا باحلامها عرض تتمناه من قلبها بس مشكلتها تخاف كل شي تخاف منه شخصيتها ماتتخذ القرار البندري تاخذه عنها ..بس لا لازم هذي المره تفكر كويس وتقرر صح

بدر بعد عنها بضيقه ..تاكد انه كان يتوهم المكالمه وانه ماسمعها كويس ...اكيد تكرهه وماتطيق وجهه : تصبحين على خير ..

تركها وراح لسرير عطاها ظهره ..

راحت لغرفتها المعتاده تفكر بكلامه ممكن تنسى كل شي ..(( يالله يالجوري انتي لهذي الدرجه حقوده خمس شهور مانسيتي .. شوفي لوجين بس قابلته مره ثانيه نست كل شي وسامحته وهي ماعاشت معه وكلت من طبخه او شافت شوشته اذا صحى من النوم .. ليه يالجوري ماتنسين انتي كذا تعذبين نفسك انسي لانه لو احد غيره كان من زمان تاركك اصلا كان مافكر يتزوجك .... خلاص ابنسى كل شي بس في اشياء كثير لازم اعرفها قبل ))


رجعت للغرفه وهي متردده فتحت الباب وبدر على وضعيته بس كان يرتجف .. .. كان يان ويرتجف .. خافت عليه قربت منه وقلبها يدق بسرعه : بدر

ناظرها شبه مغمض وقال بصوت مبحوح : الجوري محتاجلك ..

الجوري ارتعش جسمها من كلمته محتاجلك ...

بدر وجهه احمر حطت ايها على راسه كان حار مسخن مرره خافت : بدر

بكت : بدر حبيبي وشفيك
مانتبهت هي وش قالت المهم يرد عليه

بدر يحس بانه بيغمى عليه : الابره الابره

الجوري ناظرته مو فاهمه شي : اي ابره

بدر : الانسولين

الجوري تذكرت : ايوه وينها ..؟

بدر ياشر على الدرج ....

الجوري وقفت تناظره خايفه عليه ..

مد ايده لها : تكفين انسي كرهك شوي وعطيني الابره


الجوري بكت : وين هنا

بدر ياشر لها وهو يرتجف اصابعه كانت ترجف : ايوه

مشت الجوري لعنده وهي خايفه ومتردده بدر محتاجلها خذت الابره وعبتها انسولين : .كم

بدر : 25

الجوري عبتها وعطته اياه : ماعرف ماعرف انت

بدر اخذها وحقن نفسه ..

جلست الجوري بجنبه على السرير وحطت ايدها على ظهره : بدر ..

بدر ماقدر يلف عارف انها تكررهه وانها شمتانه فيه بس هو يحبها ويخاف عليها : تكفين الجوري – راح صوته - لاتزديها علي

الجوري لفته لجهتها ناظرها ووده يرتمي بصدرها ويبكي : بدر اذا انت لهاللحين عند كلمتك ننسى فانا من الليله زوجتك ...

%%%%%%%%%%%%%%%%%%%%%%%

اليوم الثاني

ذوق مع لوجين بالطياره متفقين مع مصفف لبناني ياخذوا منه الفساتين ويعمل لهم الشعر بظرف ساعات كانوا بلبنان ... ومتحمسين ...

ذوق : يله يالعروس علشان نلحق نرجع للمعرس

لوجين خايفه : غريبه احس اني خايفه وقلبي يرجف

ذوق : ههههه غريبه ياحليلك طبيعي

لوجين: والله ..؟ اول مره احس كذا

ذوق : لانها او خطوبه لك ...

المصفف: اهلا وسهلا تفزلوا

طبعا كانت لهم خدمه خاصه (( سبيشل )) ولو هاي بنت الكاسر ...

%%%%%%%%%%%%%%%%%%%%%%%%%%%%%%%%%%

السعوديه – الرياض

بقاعة فندق عايله الكاسر ...

البندري بالبيجامه : وينها الجوري تاخرت ..

نواره بالبيجامه : لا ماتاخرت حنا جينا بدري تو الناس 9 الصباح

البندري: آآآآآه لنا الله هم مصففين بلبنان وحنا ..حنان دشتي

نواره : اسكتي المصففات جوا

البندري: وانا صادقه هاللحين بتصير عيوننا كان حد مبكسها

نواره: حرام عليك والله ان مكياجها ياخذ العقل

ام البندري ونوره ام عبدالرحمن وام ذوق ومريم جالسين على وحده من طاولات لقاعه يفطرون سترول ودونات

ام البندري: بنو نواره تعالوا افطروا

نواره : وصل الفطور

مريم : ايوه محمد توه جايبه يله علشان تتجهزوا وتس تقبلوا الضيوف

ام ذوق سانده راسها على الطاوله وشعرها القصير متناثر حواليها : يالله فيني النوم ليه العجله

ام عبدالرحمن سايحه بالكرسي : لوجين الله يهديها من بعد صلاة الفجر وهي فاتحه القاعه وتقولنا روحوا

البندري: الله يوفقها

ام البندري: يمه البندري تعالي كل مو زين لك ماكلتي من اول ماقمتي

البندري : ان شاء الله يمه ..

مريم : يام رائد مافي اخبار عن رائد

البندري : ايوه خالتي ماحكى معكم

ام رائد: لا والله ماسمعنا صوته من سافرتي

البندري تتنهد : الله يستر

نواره تغير الموضوع : دقوا على الجوري تاخرت

ام عبدالرحمن : ماترد مادري وش فيها ..؟
نواره : ابدق على رند ورناد يشوفوا وش فيها ..؟

%%%%%%%%%%%%%%%%%%%%%%%%%%%%

الجوري صحت من النوم شافت بدر بجنبها نايم ابتسمت تموت فيه تعشقه ..

قامت تروشت تحس انها اسعد انسانه بالدنيا مرتاحه ...

اندق الباب فتح بدر عيونه بكسل ماشاف الجوري حوله ناظر الساعه .. الساعه 9 .. ابتسم وهو يسمع صوت المويه من الحمام

اندق الباب بقوه اكثر من قبل : مييييييييين ..؟

رنده : انا افتحوا فيكم شي

بدر طلع وفتح لها باب الجناح : صباح الخير

رناد : يلعن الرواقه صباح النور

رنده : وش هالرواقه على الصباح

بدر : آه يابنات انا احبكم

رنده ورناد ناظروا بعض : هههههه

بدر : والله من جدي احكي

رنده : دوم ان شاء الله

رناد: حنا بعد نحبك بس قول لجواره ان صحباتها حرقوا الجوال من كثر لايدقوا عليها وهي مطنشه

رنده : وانت حضرتك مقفل جوالك

بدر : ليه وش صاير ..؟

رناد تقلد بروده : سلامتك بس اليوم خطوبت صاحبتها واللكل هناك يبغوها تحضر ..

بدر : خلاص بقولها تامرون على شي ياحلوين ..

رنده : لا سلامتك بس مره ثانيه اذا فتحت الباب البس بلوزه لوسمحت

رناد : صح حنا عذارء

رنده : حلوه هذي عذاراء من مدبلج ماخذتها صح

رنده : لا لمة مدرسه الرياضيات هذيك

رناد: اي وحده الطويله

بدر : اقول الشرهه مو عليكم على اللي معطيكم وجه ...
سكر الباب بوجههم ..

رناد : شفتي قلة الذوق

رنده : ناس همج وش عرفهم تعالي بس تعالي نقايس الفساتين

رنده : مو تونا مقايسينهم

رناد : نسيتي فطرنا اكيد زدنا كيلو

رنده : آف يعني يبغالنا نوسعهم

رناد: ههههه حلوه شغله هي

رنده : انا ادري عنك هههههه

الجوري طلعت من الحمام : صباح الخير

بدر : صبااااح النور والطيبه صباح العسل والسكر .. صباح الجوري والمسك والكادي ...

الجوري ابتسمت وصارت خدودها حمراء

بدر رفعها يدور فيها : اقسم بالله اموت فييييييييييك

الجوري: هههههههه ..... بدر خلاص

بدر : اتركيني ياشيخه عذبتيني

الجوري: خلاص قلنا احبك

بدر نزلها : قالت احبك يابدر قلت مين قدي ..

الجوري: ههه ههههه منت بصاحي

بدر : شكلك مشتهيه جرعة دغدغه مثل امس

الجوري: لااااا لاااااا خلاص ابسكت

بدر ضمها : حياتي .. وش رايك تجلسين معي وبلاها خطوبت لوجين ..

الجوري: لا لا الا هذي بدوي لا ابروح

بدر : اممم ترجيني ..

الجوري : بدوي

بدر : خلاص اقتعت هههههه

الجوري: هههه تابرني شو رجااااال

بدر : بتروش على ماتجهزي

الجورري : ممكن استخدم جوالك ..لاني ماخذت شنطتي معي

بدر : الجوال وراعيه واهله كلهم تحت رجلينك

الجوري: لا محشوم ..

دخل بدر يتروش .. تنهد الجوري وهي مبتسمه : الله لايحرمني منك ... – دقت على نواره – هاااااااااي

نواره : نعم من معي

الجوري: هههههههه انا جوجو ..ولجو ..والجو ر

نواره : اموووت على الراواقه

الجوري رمت نفسه على السرير : آآآآآآآآه احبه

نواره : هههه حركات

الجوري: نواره امس احلى يوم بحياتي ..نواره انا مبسووووطه

نواره : دوم ياحبيتي .. علشان كذا ماتردي على جوالك

الجوري : لا والله مو كذا الجوال نسيته ببيت لجون .. نسيت انا حتى عبايتي عبايتك

نواره : صح كيف راحت عن بالي هذي .. بشري وش صار ذبحك بعد امس

الجوري : اتفلي من فمك يا شيخه ..

نواره: وين حكيك مابغى ومشعارفه ايش

الجوري: يووه عاد انا ماطحت الا بيدك انتي

نواره: ههه قدرك ونصيبك ونصيبك حيصيبك

الجوري : بعد تغنيها هههههه

نواره : لا يفوتك الاشكال اللي هنا انتي تعالي وشوفي ههههه مصخره

الجوري: ليه

نواره : لجون لشيخه مصحيتنا من الفجر وجرجرتنا على القاعه وحوسه وبالاخير هي سافرت مع ذوق للبنان

الجوري: لااااا سافروا وانا متفقه معهم

نواره : دقينا عليك مارديتي

الجوري: كل شي علشان بدوي يصير

طلع بدر من الحمام وهي لحد هاللحين بروب الحمام على السرير : جوارتي مالبستي ..؟

الجوري جلست بسرعه : انت خلصت بسرعه ..؟

نواره على الخط تسمع ومبسوطه على الحوار ...

بدر : ماجهزتي ها .. هاللحين اوريك

مشى بسرعه لعندها يدلدغها ..

الجوري : لا بدوري ههههههههه تكفى نواره ههههههه على الخط ..

نواره ابتسمت راح تفكيرها لبعيد ..

بدر : الو نواره خمس دقايق وتدق عليك

نواره: لا عادي خذوا راحتكم هههههه

سكرت وهي ميته ضحك وتدعي ربها ان الله يوفق الجوري ويعوضها ..

البندري : الحمدلله والشكر تضحي مع نفسك ..

نواره : والله اعلم والله اعلم دخلت الجوري كانت امس

البندري بحماس : جد كذابه هههههه

لفوا عليهم الحريم : وشفيكم

البندري: لووووووووووولللل عقبالك يانونو

نواره تذكرت طلال بس بسرعه بعدته عن تفكيرها ماتبغى هذي اللي تخربها على لوجين ..

&

بعد مرور 12 ساعه .. يعني 9 بالليل .. تقريبا ...

مسفر متكشخ بالبشت وواقف مع سامي اخوه وتركي صديقه ...

تركي : هذا زواجك والا خطوبتك

مسفر : والله مادري

تركي: هههههه صرتنا من عيال العز

مسفر : جد انت فاضي اهم شي اتزوجها

تركي : عقبالي باغنى منها

مسفر : انت وعارف اني اموت فيها تقول كذا كيف الغرب ..

تركي : هههه امزح معك

منصور : على البركه مسفر منك المال ومنها العيال

مسفر : تسلم الله يبارك فيك

منصور : ابعرفك على عمامها هذا - ياشر على ناس جالسين ونافخين ريشهم - عمي وائل .. وهذولا عياله سعد ومكرم ... اما هذولا اخواني صقر ونايف ... وهذا عمي طارق وعياله سلمان ونصر ومحمد ..

مسفر يهز راسه ويبتسم وهو مو مركز ...ومو معهم اساسا ..


&

ام البندري : هلا والله هلا ..... ياحياء الله ام مسفر هلا بالخير كله ..

ام مسفر مبتسمه : تسلمين يام محمد عدل

ام البندري: لا ذاكرتك ماخانتك ام محمد عدل ..

ام مسفر : يله يابنات ادخلوا ..

نواره بفستانها القصير وشعرها الغجري : هلا رنونه كيفك

رنا مبهوره بالمكان هذي ملكة اخوها جد : هلا كيف انتي

نواره: الحمدلله .. هلا العنود شخبارك

العنود بمرح : تمام وانتي وكيف عروستنا نبغى نشوفها ..

نواره : تعالوا معي ...

راحوا معها لداخل ...

لوجين واقفه قبال المرايه بفستانها الذهبي المخصر عليها مره ومفصل جسمها المتناسق والطويل مره ..مع فتحه من اول الفخذ لاخره ورافعه شعرها شنيون بخصل مبعثره وبوسطه اكسسوار ذهبي يبرق : وشرايكم اجنن صح

رنا والعنود افتحوا فمهم من حلاها كيف اخوهم ..

نواره : احم احم لجونه حمواتك هنا

لفت عليهم لوجين مبتسمه : هلا

العنود تناظرها من فوق لتحت : هلا ..

ذوق : هلا رنا..كيفك ..؟

رنا: كويسه وانتي .. اوه قصيتي شعرك ليه حرام

ذوق: تغير ..

لوجين: العنود وش رايك بالفستان ..

العنود : حلو ..

لوجين تحاول تتقرب منها لان مسفر قالها انها بنفسيه محطمه : طيب والشانيون حلو . . بيعجب مسفر ..

العنود: والله مدري

لوجين : بس مسفر يقول انك مثل ذوقه وقريبه لشخصيته

العنود حست انه ماله داعي كل هالحزازيات كانت تسوي كل هذا علشان الريم والريم هاللحين ماتفكر تحكي معها ..: اكيد بيعجبه ..

لوجين: جد .. الله يطمنك مثل ماطمنتيني ...

العنود : الا كيف اتفقتوا على الزفه

لوجين : امم انا ومسفر بندخل مع بعض بس مو مش

قااطعهم دخول الجوري : نواره هنادي بنت عمك قالبه القاعه عليك وعلى رنا ..

رنا : يالله نسيت قالت انتظري عند المدخل بالاذن ...

طلعت رنا ..وبعدها ذوق ونواره وتركوا العنود مع لوجين متقصدين

%%%%%%%%%%%%%%%%%%%%%%

تكملت الخطوبه بالبارتي الجاي ....

الفصل الثالث والاربعين

بالمستشفى ..

راكان : ولو ياطلال تصرفك غلط ليه ماعطيتها فرصه انت الغلط مو هي احمد ربك انها جئت لعندك

طلال: انا اللي صار معي فتح عيوني على اشياء كثيره انا ونواره ماننفع لبعض ..

راكان : لاااااا من متى ..؟

طلال : اول شي بذمتك قولي من بيفهم ابوي يروح يخطبها وامها مثل مانت عارف وابوها مايحتاج اقولك ... وش اقوله هي غيرهم

راكان تكتف : لا هذا حكي جديد .. مو انت تحبها مفروض توقف بوجهه

طلال: وعماتي وخالاتي بيرضوا يقابلوا امها اللي استغفر الله

راكان : عادي ليه مايقابلوها اذا كان ولدهم اللي خاطب مثل طينتها وكان صديقها بيوم من الايام

طلال : احلف انا رجال ومايعيبني شي ..

راكان: اهاااااااا رجال لاوالله ونعم الرجال

طلال: اذا بتتريق انقلع بره ..

راكان : اسمع ياطلال نواره نست كل شي وتركت السعوديه علشانك وبالاخير تقول كذا انت كيف تفكر ومن متى يهمونك عماتي وخالاتي اصلا من متى وانت تسال عن رضى عمي حمدان ياطلال انا عارفك مثل نفسي

طلال تنهد : حتى لو كل هذا راح ماقدر اتزوجها بكره بناتي من بيتزوجهم وجدتهم كذا .. لاتقولي كل رز وله كياله ..انا ماني مستعد اخلي عيالي يمشون موطين الراس

راكان احتقر طلال : هذا وانت عارف البنت واخلاقها ... اذا هي وافقت عليك اصلا لانك انت والله اللي مفروض تمشي موطي الراس

طلع معصب ..

طلال ((يالله انا صح والا غلط .. ياربي وش اسوي ..؟ ))

%%%%%%%%%%%%%%%%%%%%%%%

(( بالخطوبه ))

لوجين : انا عارفه يالعنود انك ماتستلطفيني بس وش رايك تحاولي .. انا وانتي نحاول لاننا بنعيش بعايله وحده

العنود مستغربه من صراحتها : لا عادي ..مابيني وبينك شي

لوجين : يعني بتعتبروني مثل اخت ثالثه لكم

العنود: ايوه ليه لا

لوجين: وناااااااااسه مره تسلمين ياحماتي

العنود ماتوقعت لوجين مغروره فكرتها مغروره وماهي بشايفه احد طلعت احب من الريم : اقول لوجين وين عامله مكياجك

لوجين انبسطت : حلو صح ..؟

العنود : ايوه

لوجين: عاملته بلبنان اليوم الصباح رحنا انا وذوق بالطياره ومارجعنا الا من ساعتين ماتتصورين كيف عذبن يالمصفف

العنود: وليه تمشورتوا كان عملتوه هنا

لوجين: كان الاتفاق ذا بس نوره ام عبدالرحمن بعرفك عليها بعد شوي اقترحت اني اكون مميزه

العنود: ايوه صح فكره حلوه

وضلوا سواليف وكانهم يعرفوا بعض من زمان

&

نواره : يالله شوفي الوقحه جائيه لهنا

ذوق: مين ..؟

نواره: حرم الدكتور عادل ..الريم

ذوق باهتمام: وينها الشاذي ..؟

نواره: هناك شوفيها مبسوطه بحالها بهذا الفستان البيج

ذوق: جد وقحه وش مجيبها

نواره: هذا وهو مطلقها والا يعني شوفوا انا تزوجت غيره ..

ذوق: آآآه ودي اقتلها هي مع زوجها المكسر بالمستشفى

نواره: اصبري والله لاوريك فيها ..

&

الجوري ماسكه التلفون تحكي مع بدر : لا بدوي اذا رجعت بتشوفه

بدر : لااااااا متى اطلعي هاللحين اشوفك

الجوري: بدوي ماينفع ..

بدر : اوكيه ناويه تزعليني

الجوري: بدووووووي بليز

بدر : خلاص خلاص اذا رجعتي .. ماقلتيلي كيف رنده ورناد ولمياء مبسوطين

الجوري: ايوه مره حتى الميرندات يرقصون

بدر : من ..؟

الجوري: رنده ورناد حنا نسميهم الميرندات

بدر : ههههههه والله راكب لهم ...

الجوري: ههههههههه فضيعين

ام ذوق مرت من عندها تاشر بدر .. الجوري هزت راسها .. ام ذوق سوت لها اوكيه وضحكت وتركتها ..

&

البندري جالسه عند امها ماتحركت : يمه بطني يالمني

ام البندري: لازم يمه تحركتي كثير

البندري: لا والله مو كثير حتى اني ماطلعت فوق لعند لوجين وماشفتها ..

ام البندري: يمه ادق على محمد ي

البندري قاطعتها : لاااااا لااااا مايحتاج شوي ويروح ..

ام البندري ابتسمت : والله وصرتي ام هههه

البندري: وعرفت قيمتك يالغلا كله ..

&

لوجين تناظر الساعه : باقي ساعتين على الزفه ومسفر بيجي هالحين

العنود: متوتره صح ..؟

لوجين: ياويلي بطني ماغصني وقلبي بيوقف – مدت ايدها – شوفي كيف ارجف ..؟

العنود: لازم ... اسمعيها مني لاتخافي خطوبه هينه مو مثل العرس ...

لوجين : تهقين مسفر وش يفكر فيه هاللحين

العنود: ههههه فيك اكيد هو طول الوقت انتي بباله كيف واليوم خطوبتكم

لوجين متوتره : هاللحين بيجي صح

العنود : ايوه قال خمس دقايق وهو واصل

لوجين : ياويل قلبي م

انفتح الباب فجاءه ..لفوا ثنتينهم ..

لوجين والعنود : الريم

الريم بفستانها البيج العادي او الاقل من عادي مشت بغرور لوسط الغرفه : لا يالعنود داقتها صحبه وسواليف هذي اللي اخوك تركني علشانها

لوجين : نعم خير ..تفضلي بره

الريم : مو قبل مابارك لك

العنود : الريم اقصري الشر واطلعي خلاص انتي تزوجتي اتركي مسفر يتزوج

الريم : وانا وش قلت ...؟ جايه ابارك حرام ..واقدم الهدايا بعد

العنود: مشكوره خلاص روحي مسفر يبجي بعد شوي

الريم بغيره واضحه ناظرت لوجين من فوق لتحت : بيجي يشوفك كذا ..

لوجين واثقه من نفسها بزياده هي عارفه مقدار جمالها : هههههه ليه مقهوره ...؟

الريم: لا انا مقهوره من قال ..
رجت علبة البيبسي اللي بيدها وفتحتها وكتتها على وجه لوجين : قولي لرجلك مو اخت نهار اللي تنعاف

لوجين والعنود شهقوا ..طلعت بسرعه وسكرت الباب بقوه

لوجين صرخت : ايش هذا ..؟

العنود لحقتها : يالغبيه وش سويتي انتي كيف تفكري

الريم : تستاهل احسن بنت الشوارع اللي ماترب

جاءها كف على وجهها من العنود : انطمي ياقليلة الذات انتي اللي ماتربيتي جد عمي ماجاب عيال ..

الريم مشت بسرعه لبره قبل لايشوفوها البنات ويتولوها ..

رجعت العنود للوجين المنهاره بكي : شوفي ايش سوت اخترب كل شي

العنود : لاتخافي يالوجين كل شي يتصلح

لوجين رمت نفسها على الكرسي : شوفي شوفي كيف كل شي خرب الفستان الشانيون الميك اب .. يالله وين نواره ..؟

العنود : هاللحين بناديها ان شاء الله

اندق الباب بهدوء ..

العنود: يمكن هي ..

لوجين: لا اكيد هذا مسفر انا متاكده تكفين العنود لاتخلينه ي

وقبل لاتكمل حكيها انفتح الباب وطل منه مسفر بالبشت وحالق

لوجين غطت وجهها وزادت بكي : لاااااا

مسفر ناظرها وناظر العنود ..مستغرب

العنود: الريم الغبيه كتت عليها البيبسي

مسفر : كيف ..؟

لوجين : اطلع بره اطلع لاتشوفني كذا

مسفر تقريبا فهم وش صار راح لعندها : لجونه ناظريني ..

العنود طلت بره تتركهم على راحتهم او بالاصح تخبر البنات

مسفر رمى البشت وجلس عند رجلها : ليه لاتبكين احبك بكل شي عادي اتركيها تعمل اللي تبغاه انا لك وانتي لي هذا اهم شي

لوجين : الحقود خربت شكلي

مسفر : طيب وريني يمكن مو خربان بالمره

لوجين رفعت ايدها ودمعاتها بعيونها

مسفر يبوسها بخدها وانفها وكل شي بوجهها : احبك لو عليك مبيد حشري ..

لوجين ضحكت والدمعه بهدبها : ههههههههه

&

نواره : كيف ..؟

العنود: هذا اللي صار ومسفر معها هاللحين

ذوق بانفعال : هذي كيف تفكر الحقيره

نواره : الله لايوفقها وانا اقول ليه مشيت بسرعه لبره

ذوق: والله لو اشوفها اللعن خيرها

العنود سكتت ماترضى على بنت عمها لكن معهم حق

نواره وذوق بسرعه طلعوا لهم فوق ..

رنا : وشفيكم ..؟

هنادي : ليه مرتبكين

العنود: الريم المجنونه

رنا: الريم وش فيها ..؟

ام مسفر : وش صاير يابنت وش فيكم

العنود: يمه الغيبه بنت عمي الريم كتت على لوجين البيبسي

اللكل : هاااااااه

&

ام ذوق تتمشى بين الحضور نافخه ريشها كانها ام العرووس اكيد دام ان بنت الكاسر تعتبرها مثل خالتها وش تبغى بعد ...
سمعت وهي ماشيه ..لمياء وام سعوج يقولوا

لمياء : ها يام سعود دوري لبدر وحده

ام سعود: نبغاها احلى من الجوري علشان تحطمها ..

لمياء : هههههه تستاهل المغروره

ام سعود: اجل بدر ينحرم من العيال علشانها .. قولي كيف بنقنعه ..؟

لمياء : لاتخافي امي متوليه المهمه الاساسيه

ام سعود: وش رايك بهذي ام الرمادي

لمياء : لااااا وين الزفت الجوري احلى

ام سعود: نسال خطابه ونعطيها المواصفات ...

ام ذوق انصدمت من اللي سمعته راحت تدور الجوري بسرعه ..

&

الجوري : لا والله بدر من جدي ماحبه

بدر : ههه هههههه يعني معك فوبياء دكتور الاسنان

الجوري: بدوووووي لاتتريق من جدي اخاف منهم ..

بدر : ليه وش السبب ياقلبي ..؟

الجوري: مادري يمكن لاني اموت على الحلويات من صغري ..

بدر : اكثر مني ..

الجوري بنعومه : لا طبعا ...

بدر : وانا احب واعشقك واموت فيك

الجوري: ههههههه

ام ذوق : انتي هنا لحد هاللحين ماسكرتي ..

الجوري انحرجت : لا احاكي وعد صديقتي

ام ذوق : علينا وعد اقول سكري من بدر والله ساعه وانتم تحكون ماعندكم بيت .. اللي يشوفك يقول مخطوبه

بدر : الله واكبر من هذي ..؟ اللي حاسدتنا

الجوري: هذي خالتي ام رائد ... احكيك بعد شوي اوكيه

ام رائد: بعد فيها بعد شوي

بدر : قوليلها تذكر الله حنا ماصدقنا

الجوري: ههههههه فشله يله باي

بدر : باي

ام ذوق : مشاء الله.. الله يدوم عليكم

الجوري: تسلمين ..

ام ذوق : اسمعي ام سعود ولمياء مو سهلين

الجوري: ها ..؟

ام ذوق حكت لها كل اللي سمعته

الجوري: هذا اللي كنت خايفه منه

ام ذوق : انتي مبته رجلك ..

الجوري: مادري ..؟

ام ذوق : اجل ارجعي احكي معه .. واسمعي زيدي من جرعة الحنان هذي الايام بزياده ...نوميه مغناطيسي بعيونك الزرقاء

الجوري: هههههه حركات ..... ام رائد خطيره ..

ام ذوق : افا عليك اجل كيف ثبت بو رائد

الجوري : بشوف الضيوف شوي بعدين بحاكيه ..

ام ذوق : هو بيدق اصلا ههههههه

تركتها الجوري ومشت ..

&

نواره وذوق فتحوا الباب بسرعه ...

مسفر : دقوا الباب المره الجايه

نواره : وش صاير

لوجين مبتسمه : خربت مكياجي ..

ذوق : ولا يهمك انا اضبطه لك ... واذا على الفستان نواره تروح لبيتنا وتجيب فستاني اللي كنت مجهزته لرجعتي من بعد شهر العسل مع عادل ..

نواره: الخسيسه القذره جد ناس ماتستحي

مسفر : كم ياخذ وقت تضبيطها علشان الزفه ..

ذوق : ساعه باقي معنا ساعه ونص يمدي لنا ساعه ..

لوجين : اكيد ..

مسفر يبوس ايدها : انتظرك هنا ابشوف كيف يحطوا المكياج

نواره: لا يازوج اختي انت بتدبر لي حد يوصلنا لبيت ذوق

مسفر : مالك الا ناصر

نواره : اذا كذا اوكيه

ذوق: في مشكله ..انا ماعرف اشتغل والمعرس على راسي

مسفر : لا انا المعرس هنا واذا قلت بجلس بجلس

&


الزفه ....

العنود كانت حاطه ايدها على قلبها كيف بيطلع شكل لوجين تحس بتانيب الضمير من اللي عملته الريم ...

اشتغلت موسيقى كلاسيكيه حزينه .. عراقيه ..
الناس كلها عيونها لاول الجسر .. لكن الاضاء تحولت للمسرح .. وتناثر الورد من السقف على الارض لحد مامتلت ورود المعازيم يناظروا الورد وحركاتها بالهواء وهي تدور جد ابداع









نونه الحلوه
مشاهدة ملفه الشخصي
إرسال رسالة خاصة إلى نونه الحلوه
البحث عن المزيد من المشاركات المكتوبة بواسطة نونه الحلوه
أضف نونه الحلوه إلى قائمة الأصدقاء

22-06-2007, 07:40 PM رقم المشاركة : 180

... عضو ذهبي ...


الملف الشخصي









الحالة



--------------------------------------------------------------------------------

اللكل ساكت مبهور ..

مع الموسيقى الرومنسيه الحزينه نزل من فوق كرسي لشخصين فيه مسفر وبجنبه لوجين .. .. كان مثبت من فوق وينزل بهدوء وهم فيه

الجوري والبندري وذوق ورنا ورناد ورنده صفقوا وصارخوا

لوجين كانت ماسكه بايد مسفر ترتجف وخايفه ايدها كانت بارده مره .. ومسفر مع الموسيقى نسى الناس وكل شي حوله وعيونه على حياته لوجين ...

اخيرا طلع صوت نواره مع الموسيقى صوت رومنسسسسي مره
(( كون يمك ...
*الف هنيان اليوم اليوم ..
-غرقت عيونها تذكرت طلال -
*الف هنيان الليله انام يمك ...

*انا احبببببببببك ...
- دقت الجوري على بدر بسرعه تسمعه الاغنيه بدر ردد : الو لكن لماسمع انا احبببببك سكت –
*انا احببببببك
*واحب كل حرف باسمك ...
*مسفر ...

- مسفر ناظر بلوجين اللي ابتسمت له بشوق : والله احبك -
*كون ابوسك
*كون اضمك
-نزلت دموع نواره بس حاولت ماياثر على صوتها ..غمضت عيونها وتخيلت طلال قدامها .. -
* كون ابوسك
*كون اضمك
*كون اشمئك

*كون احط راسي على صدرك ..
*بلكي خدي يزيل همك ..

*ناري ماتطفى ولا نارك طفت ..
*وعيني قبل تبجي اذا عينك بجت ..

- نزلوا للارض والورد من حولهم ينزل والمصوره مبهوره باللي تشوفه ..
*يالعزيز مابعد عن بالي لحضه ..

وصل الكرسي لقبل الارض بمسافه قصيره نزلوا مسفر ولوجين منه بهدوء ..ووقفوا للمصوره وكان كل واحد مسفر يناظر بعيون لوجين وماتهمه اي عيون موجوده ..ولوجين تناظر الارض وخدودها حمراء .. تحس بحياء من نظراته ..

هنادي و رنا والعنود ورنده ورناد وذوق والبندري متحمسين مره معهم يصفقون من قلب ..

الجوري : ها بدوي وش رايك ..؟

بدر : احمدي ربك انك موقبالي هاللحين .. لا والله

الجوري : هههههه الحمدلله ..

بدر : يله تراك ثقلتيها متى بتطلعي

الجوري: بعد مانتعشى

&

ام البندري : يام مسفر قومي عطي مسفر الشبكه يلبسها اياه ..

ام مسفر : انا لا لالالا مو لازم

ام ذوق : وش مولازم انتي الخير والبركه

طلعت ام مسفر المسرح بوقار للمسرح .. مسفر طبعا كان بدون البشت لان لوجين مايعجبها ..: هلا يمه هلا والله

ام مسفر تناظر لوجين : مباركين ان شاء الله ..

لوجين : الله يبارك فيك خالتوا عقبال البنات

ام مسفر : تسلمين حبيبتي ..

نجلاء بنت صفاء الصغيره جئت بالعربه اللي فيها الكيكه والعصير

مسفر : لاتقولين باكلك قدام هالخلاق

لوجين : شووور

مسفر : اخاف اكلك

لوجين: ههههههه اش خالتوا هنا

ام مسفر : يله اقطعوا الكيكه

مسفر حط ايده على ايد لوجين ويحس انها بحلم ماوده يصحى منه ..لوجين كانت تحاول تخفف من ارتباكها لانها ملربكه فيصل معها ... قطعوا الكيكه سوا
واكلها الكيكه وكانت بتطيح من فمها لانها كبيره ... سحبتها ام مسفر بسرعه لداخل فم لوجين ..

لوجين ارتجفت شفايفها ودها تبكي تحس بحنان ام مسفر : تسلمين ماما

مسفر كان بيضحك بصوت عالي (( ماما يعني احترام .. لو تدري كيف امي تهاوش خواتي اذا قالوا ماما وتقول مايعات كان ماقلتيها ...))

اكلت لوجين مسفر قطعه صغيره بعكس قطعته اللي ماكفت فمها الضغير .. شربوا بعض العصير ..

ومددت ام مسفر الخواتم ..
اخذ مسفر الخاتم بايد مرتجفه متوتر مرره واللكل حوله مدت لوجين ايدها اليمين لبسها اياه برقه .. وهي نفس حالته كانت ترتجف حتى ان الخاتم بيطيح من ايدها ..مسفر متلخبط مد ايده اليسار ..

ام مسفر : مستعجل ههههههههه اليمين

مسفر : يمه حدي متوتر

لوجين عاقده حواجبها تحس انها متوتره مره

نواره : لجوووون سميييييل ..ابتسمي

لوجين ناظرتهم وابتسمت ..

لبسته الخاتم وهي تسرق اللحضات وتناظره بعد كذا تنزل عيونها ...

طبعا هذا كله كان بسرعه بس كان بالنسبه للوجين ومسفر اجمل لحضات حياتهم عاشوها ثانيه بثانيه ودقيقه بدقيقه ..

ام عبدالرحمن : لوووووووووووووولللللللللل

البنات وراها : لوووووووووووللللللل

وغردوا عصافير الحب لوجين ومسفر متمنين لحياتهم سعاده ابديه ..

&

الجوري متاثره تمسك ايد نواره وعيونها مغرقه : اول شي صوتك جنان ثاني شي .....- باستها بخدها من قلب - لولا الله ثم انتي كان انا مو بهالوناسه هاللحين

نواره : دوووووم مو يوم ياحبيبتي انتي ..

الجوري: شفتي عيون لوجين كيف تيبرق ومبسوطه انا مثلها بعد ..

نواره : دوم ياحياتي ...

&

منصور عند البوفيه ..: العرسان هاللحين بيجوا كل شي جاهز

الموظف : اي استاز منصور كل اشي جاهز

منصور : حلو

...................

رنا : هنوده تعالي وش فيك خايفه

هنادي : يوه كاننا مفاجيع جاين للبوفيه

رنا : تعالي وانتي ساكته محد حولك مع المعاريس ..

هنادي تمشي وراء رنا وتتلفت ..

دخلت رنا للبوفيه وهي رفعه الفستان وتركض : تعالي بسرررررررعه ههههههه

منصور لف لصوت

رنا ماسكه فستانها ولافه ورى عند هنادي : يللله محد حولك

منصور ابتسم وهو يناظر ام الفوشي اللي داخله وكان تحتها مويه على رفعت الفستان ..

هنادي: رناااااااا بذبحك – سكتت وهي تشوف منصور يقز برنا.. ركضت لبره - تعالي بسرعه ولاتلفين وراك

رنا ببلاهه لفت شافت واحد مزيون يناظرها فتحت فمها تناظره

هنادي ركضت لعندها تسحبها : ياللهبله تعالي

رنا ركضت معها بسرعه

منصور وقف يضحك (( هذي اللي يدور عليها... هذي اللي يبغاها من كل سفراته سيقانها بيضاء وطويله .. رنا ياحلو اسمها .. مالي الا بنت عمي تضبطني ...))

انتهت الخطوبه بسعاده رغم كل المنقصات

%%%%%%%%%%%%%%%%%%

الجوري و ام سعود ولمياء ورنده ورناد ركبوا السياره الهمر ينتظروا بدر يطلع

رنده : ياحلو البطاره ...

رناد: آآآآآيه العز عز

ام سعود : احمدي ربك انتي معها على النعمه اللي انتوا فيها

الجوري مقهوره من ام سعود ولمياء : هذا الفندق لوحده مايجي شعره من املاك لوجين .. عمامها فقر بالنسبه لها

ام سعود: واضح عليها فسقانه وجرايئه

الجوري: وش قصدك بفسقانه انا ماسمح لك هذي اعز من الاخت

ام سعود: يووه يوووه ماحكينا

رنده : الجور متوتره صح علشان صحباتك ..

رناد: معك حق والله لو تزوج رنده اموت

لمياء : توك صغار على هالسوواليف

دخل بدر مستعجل ويتنفس بسرعه : تاخرت عليكم ..

الجوري طبعا مرتزه قدامك : لا حبيبي خذ راحتك

بدر : ياحليله عمك ماتركني الا متعشي ومحلي

الجوري: اكيد هذا عمو ..

بدر : ها بنات انبسطتوا

لمياء : طلعه والسلام ..

رنده: اها طلعه واللامه وانتي طلعت عيونك على الناس

لمياء: انطمي ...

بدر : تعشيتوا

ام سعود : ايوه مع ان البوقيه بارد ..

الجوري : بدوي انتم عندكم بوفيه والا ص

بدر : لا بوفيه ومشاء الله كبير ..

رنده : حنا 9x 9 ..

رناد: يعني طول بعرض مشاء الله

ام سعود: يالفجعانات اللي يسمعكم ماشفتوا بوفيه من قبل

رنده ورناد سكتتتتتتوا ..

وصلوا للبيت والجو بالسياره كان متوتر مره ..

لمياء وهي تنزل : مر على ماما مو تنسى

بدر : اوكيه ...

نزلوا اللكل وكانت الجوري تحول تبعده عن امه بس اليوم علشان مايلعبون براسه ..

الجوري بدلع : دودي وش رايك بمكياجي

بدر مسكها مع خصرها وهو مبسوط ومبتسم : انتي اللي محليته مو هو ..يله ابغى اشوف الفستان ..

الجوري: يله (( يارب ياااارب امك نايمه يارب يابدر ماتحمل تشاركني غيرك ))

بعد مادخلوا للغرفه الجوري واقفه تناظر فيه وساكته ..

بدر : جوارتي وين سرحتي ..؟

الجوري ناظرته : متى بنروح للندن ..

بدر عقد حواجبه : غريبه مو انتي ماتبغين ..؟

الجوري مشت لعند الدولاب :لاابغى عادي الشنط وجاهزه يله نسافر من هنا

بدر مسكها من ايدها : تعالي اجلسي وفهميني ليه كل هذا ..؟

الجوري وقفت متوتره : ماقلتلي وش رايك بالفستان .؟

بدر : جوري وش فيك ..؟

الجوري : بدر انت ..؟ انت ..؟ يعني لو .. انا سمعت

بدر ابسم لها بحنان : تعالي بجنبي وقولي اللي بخاطرك ..

الجوري : ان

اندق الباب : بدر نايم

الجوري وقف قلبها : خالتي .. هذي خالتي

بدر مو فاهم عليها : جواره وش فيك .. – فتح الباب - : هلا يمه ..

ام بدر : ليكون ازعجتكم ..؟

الجوري طلعت من الغرفه وهي مستعده لاي شي تقولك ومجهزه نفسها ترجع لبيت عمها اذا قالت لبدر عن العروس الجديده : لا خالتي تفضلي ..

ام بدر جلست : ها كيف زواج صديقتك

الجوري مالها خلق توضح لها انها ملكه مو زواج : حلو كنتي ناقصتنا

ام بدر : ههه لا انا بعد ماراحوا مني الغالين مالي عرس احضره

بدر : شدعوه يمه يعني زواج لمياء مانتي بحاضرته

ام بدر بجديه : بغيتك بموضوع ضروري

الجوري : عن اذنكم ..

ام بدر : لا وانتي معه ..

الجوري: انا ..؟ ليه ..؟

بدر : هلا يمه .. وش بغيتي ..؟

ام بدر : اجلسوا وبتعرفون ..

جلست الجوري لازقه ببدر من خوفها ..

بدر بهمس : الجوري وش فيك ..؟

الجوري : سمي خالتي وش بغيتي

ام بدر : يالجوري انا عارفه انك ماتقدري تجيبي عيال وان مافيك رحم

الجوري الدموع تجمعت بسرعه بعيونها اسرع مما توقعت ..هذا الموضوع يجرحها بقوه ..

بدر : من قالك.؟ وكيف عرفتي ..؟

ام بدر : ابراهيم .. قالي ..

بدر لف على الجوري : وابراهيم كيف عرف

الجوري مرتبكه : نسيت هو كان دكتوري الخاص وعارف الحاله ..

بدر : ومن و

قاطعته امها وهي توقف : انا ماجيت اقولك ابغى احفادي ومش عارفه ايش لا .. انا جايه – حطت ايدها على كتف الجوري – اقولك حط الجوري بعيونك .. انت السبب بكل هذا وانت اللي تتحمل

بدر وقف منفعل : انا م

ام بدر : لا تقاطع .. واذا على كيف عرفت .. ابراهيم حكى لنا ان الجوري تعرضت لاغتصاب – ناظرت بعيون الجوري بحنان اللي بكت غصب عنها – ضاعت عذريتها بيد واحد ماعرفت امه تربيه .. – رفعت ايدها من كتف الجوري لخد بدر بكف محترم – جد ماعرفت اربيك يابدر

الجوري شهقت وحطت ايدها على فمها ..

بدر عصب وانقهر : يمممممممه انا مو بزر علشان تضربيني

ام بدر : واكسر راسك ياليتني ضربتك وانت بزر كان طلعت رجال ... انت عندك خوات كيف مافكرت فيهم .. عندك ام وخاله وعمه .. ليه ماحسبت حسبت حساب الدين .. ترى الشرف والعرض دين ياولدي دين ..

بدر ضاغط على اسنانه : الجوري ادخلي داخل

الجوري بسرعه قامت لداخل خافت كان بدر معصب وامه قويه ..

بدر : يمه كيف تضربيني قدامها

ام بدر : حرام عليك البنت مو انها يتيمه تلعب عليها ..الله عاقبك باللي جائها وبلاك بحبها .. تفكرني مو حاسه فيك .. مو حاسه بارتفاع السكر عندك كل يوم ..انتظر وماشفت شي .. انت لعبت بعفة بنت يابدر بعفتها ..

بدر : بس انا تبت وتزوجتها ..والله يمه هذي اول وحده ..

ام بدر : وهذا اللي حارق قلبي ومعذبني ليه يابدر ليه .. كان قلتلي اخطبها لك وخلاص ليه تغضب ربك ليه ..؟

بدر : مادري لحضة شيطان كله من طلال و

ام بدر : اسمع اذا مشيت ورى كلام السوسه ام سعود واختك لمياء الهبله وتزوجت عليها لاني امك ولا اعرفك سمعت ..

بدر: اكيد يمه مستحيل هذي الجوري

ام بدر : ياليتك تقدر هذي الورده المسكينه اخوك ابراهيم حكى لي عن حالتها مسكينه مالها الا الله ثم انت ..

بدر : ابشري يمه بعيوني هي – باس ايدها – بس رضاك ودعواتك

ام بدر : اذا سمعت انها مبسوطه معك ذيك الساعه ادعي لك ..

تركته وطلعت ... بدر تنهد (( يمه منك يالعجوز قويه بس احبك ))

الجوري طلعت وقفت تناظره

بدر : سمعتي كل شي صح ..؟

الجوري باسته على خده مكان الكف : والله انها تسوى اللكل

بدر : لانها ضربتني يعني

الجوري : لا انت الخير والبركه .. –سكتت شوي بعدين قالت - دودو ..

بدر مبتسم : عيونه

الجوري نزلت دموعها : انت ممكن تتزوج علي

بدر : امممم

الجوري خافت ..

بدر رفعها : اذا تحررت فلسطين اتزوج عليك ..هههههههه

%%%%%%%%%%%%%%%%%%%%%%%%%

قريب الفجر وباخر الليل ..
البندري متمدده على السرير وتحس بالم بظهرها .. اكيد السفر والحركه الكثيره تاثر على صحتها وعلى اللي ببطنها .. رفعت عنها الغطاء تحس بحر وانها عرقانه مرره حتى ان شعرها البني لاصق بوجهها من كثر ماهي عرقانه مسكت بطنبها :آآمم آآه يمه ... يمه

كانت تتنفس بصعوبه ومكل شي حولها ضبابي : يمه ..يمه

لكن

صوتها مو واضح ابد مع العوازل والمكيفات ..: يمه آه يمه
بكت : يمه لحقي علي ..

ممافي رد .. سحبت رجلها سحب ..بس مع الاسف رجلها ماتقوى توقف طاحت على الارض البارده وصارت تزحف لحد غرفة امها .. زحفت مثل الطفل الصغير اللي يحبو لامه ...: يمه .. يمه ..

وصلت لعند الغرفه دفت الباب ودخلت .. امها كانت نايييييمه ومستغرقه بالنوم .. رفعت نفسها وهي تشهق لسرير امها وحطت ايدها على كتفها وبصوت ضعيف يادوب يطلع مع انفاسها الضيقه : يمه يمه