مشكوررررررره اختيــ

و الله يعطيج العاااااااااافيه

و تسـلمين

شووو مهره باقي مانزلتي الجزء الثاني

اعتذر للجميع

انا اسفه بس كان عندي ظروف خاصه

اتمنى تعذروني

وانا الحين بنزل البارت

الفصل الأول
"الجزء الثاني "
دخلوا من الحوش الخلفي للفيلا ..ندى كانت منبهره باللي تشوفه كان الحوش مطل على المسبح وفيه اربع مداخل بأبواب ذات طابع فرنسي من خشب الماهوجني الفاخرتصل بين غرفة الجلوس ومنطقة المسبح ..لما دخلوا غرفة الجلوس شافت قدامها ناس ماتعرفهم ..أحساس الغربه والوحده كان يجتاحها وقفت تتأملهم كانت تهمس بداخلها *اللهم لااعتراض على حكمك ..صبرني يارب ..صبرني *..جات ديمه تجري وضمت امها / الحمد لله سلامتك يااحلى ام في الدنيا ..وحشتيني
نجاة /هلا والله وغلا بحبيبة قلبي
ندى كانت واقفه بعبايتها اللي على الراس ومتغطيه ..
احلام تهمس لحنين / هذي البنت اللي لهم شهرين يناقزون عليها ..وع كنها عجوز ..
حنين / انكتمي ..أنتي جيتي عشان تسبين بس
نجاة انتبهت لندى اللي مازالت متسمره مكانها وبعبايتها كمان /ندى تعالي قربي وفسخي عبايتك ..سيتي تعالي خذي العبايه ..
ندى كانت سرحانه وماسمعت شي من نجاة ..والكل كان منتظر يشوف الشخص الغريب اللي مغطى بالسواد ..وأولهم أحلام ..اللي كانت مجمعه حش فيها عشان تقوله لشذى ..جات سيتي وأخذت عناية أم طلال ووقفت عند ندى / ممكن عبايه ..فاقت ندى من سرحانها على صوت سيتي ..فسخت عبايتها وأعطتها لسيتي
حنين تهمس لأحلام / وااااو تجنن ..
أحلام / انتبهي لا تنجني ..أف خسارة طلعت حلوه
ندى كانت لابسه بنطلون ابيض وبلوزه زهري ومسويه شعرها ذيل حصان وشوية خصل على وجهها ..كان فيها شبه من فراس في رسمة الوجه والعيون الوساع بلونها الرمادي والفم الصغير
قربة ديمه من ندى وحضنتها / يلي أخيرا صار عندي أخت ..أنا أختك ديمه ..تقدمت حنين وسلمت / هلا والله أنا عمتك حنين ..بس لاتقولين لي عمه لاني حبيت ابين لك صلة القرابه فقط لاغير
وبعدها احلام /يامرحبا والله ..انا عمتك احلام 0وشددت..عمتك لاتنسين
مساعد /امحق عمه وخري بس ..الحين احنا عندنا بنت بهالزين كله واحنا مو دارين ..
ندى مافكرت ترد على احد ولا حتى بأبتسامه ..
جلسوا في غرفة الجلوس .. اللي كان سقفها خشبي رائع ومرسوم باليد اللي اعطى بعُد اعمق وارقى ..محدد مقياس الغرفه وكمان كانت تحتوي على انتيكات فرنسيه وقطع اثاث مطبوعه بنقوش حيوانيه ..
جلست وهي مو عارفه شعورها اللي داخلها هل هو خوف من هالعائله اللي ماتعرف خيرهم من شرهم ..والا كره وحقد عليهم ..بس اللي كانت تعرفه انها تتمنى ان اللي هيه فيه حلم وانها راح تصحى منه
احلام لحنين / شوفي كيف شايفه نفسها ولا فكرت ترد ولا بكلمه واحده ..حتى ليتها جاملت بأبتسامه ..
حنين / اسكتي فشلتينا لا أحد يسمعك ..انا عارفه انك ماجيتي الا عشان تحشين ..بعدين مسكينه وش تبغينها تسوي تأخذك بالأحضان .يكفي ان احنا ماخذينها من الناس اللي تعتبرهم اهلها وبعدين حطي نفسك مكانها و..
أحلام / خلاص رجيتي راسي ..هونت وياكلمه ردي مكانك
خليني اقوم احش عند ديمه افضل
حنين / اجلسي يالفالحه ..نسيتي ان ديمه اختها
أحلام / ايه صح ..خساره
عبدالرحمن /ديمه وين اخوك عمر
ديمه / يلعب بلاستيشن يقول بيخلص الجوليه ويجي ..عمر / انا هنا بابا
عبدالرحمن / هلا والله بحبيب قلبي ..عموره
عمر / بابا ..لاتكلمني كذا انا رجال
فراس / والرجاجيل ..تسلم إذا دخلت
عمر / اوه نسيت ..سلام عليكم
نجاة /تعال حبيبي ..سلم والا ماوحشتك
عمر باس امه وجلس
نجاة / قبل ماتجلس ..روح سلم على اختك ندى شوفها وراك
التفت عمر عليها وسلم / والله صدق أختي ..شوفوا كيف تشبه فراس ..كيفك ندى
ندى / الحمدلله
صاح طلال/ الحمدلله..واخيرا سمعت صوتك صراحه توقعتك خرسى .. تصدقون من يوم نزلت من بيتهم ماسمعنا صوتها.. اجيب لها سالفه منا والا منا لعل وعسى ترد وهي ولاهي يمي ..اخر شي يئست وانطميت
ندى الموضوع ماكنه عنها انتبهت على دقت جوالها *ياي أخيراً أكيد هذي امي *
ندى/ هلا والله وغلا بماماتي الحلوه
جنى / انا جنى ..وينك ماتردين لنا ساعتين واحنا ندق
ندى /والله ماسمعته هذي اول دقه اسمعها ..بعدين انتي عارفه ان الجرس خربان يعني اعذريني ..جنى/وش معنى الحين دق
ندى/ شكله اخذ دقه على راسه من العطر والا المرايه أو أي شي في الشنطه اهم شي اني رديت ..ياله اعطيني ماماتي
جنى / لحظه..أمي تعالي كلمي ندى ع الخط ... رجعة السماعه لاذنها ..ياحليلها جايه تجري ..خذيها
منيره/ هلا والله بحبيبة قلبي ..وش اخبارك ..وينك يمه
ندى/ انا الحمدلله بخير وانا الحين في بيتهم ي الرياض *يارب ساعدني لا أصيح عشان امي بس *
منيره/ الرياض مره وحده ..يكفي أنهم أخذوك مني كمان يطلعونك من الطائف..حسبي الله عليم والله البيت من دونك مايسوى ....وجلست تبكي.. ندى ماقدرت تمسك نفسها أكثر ..وصاحت معها
انتبهت عالعيون اللي كانت عليها ..حاولت تغطي على وجهها بشعرها اللي كان مقصص مدرج الى نص الظهر لأن مافي أمل توقف دموعها /امي ..تكفين لا تبكين ..أنا إنشاء الله بكون بخير والله مايضايقني غير دموعك ..إذا تبغيني اكون مبسوطه لا عاد تصيحين ..ياله الحين بقفل سلمي على ابوي وعبدالله والبنات
منيره / يوصل ياروحي ..انتبهي لنفسك واي شي يصير معك علمينا ..ياله في حفظ الله
ندى/ مع السلامه ..قفلت بس مارفعت راسها لإنها ماهي قادره تسكت ..
جات لميس تجري ومسكت رجول ندى
مساعد/ تعلى هنا .. لميس/ لا ماابعى ..
صرخ فيها / قلت لك تعالي هنا
لميس تمسكت في رجول ندى أكثر وجلست تصيح ..
ندى مسحت دموعها / اتركها لا تخاصمها .. تعالي حبيبي أجلسي في حضني
نجاة / الا ليش ماجبت منى معاك
مساعد/ والله راحت عند اهلها ..قالت خذ عيالك ولا اشوف وجهك الا الساعه وحده
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــ
في بيت أحمد في الطائف ..
جنى/ الهام ..عبدالله يقول كوي شماغي بسرعه
الهام/ كويته من زمان ..قولي له يلقاه على الكنب اللي في المجلس ..
وبعدين تعالي عشان تغسلين المواعين
جنى/ والله ماأجي ..ماابغى اغسل
الهام/ مو بكيفك ..ندى راحت والحين يوم عليك ويوم عليه
منيره/ الهام.. جهزي العشاء أبوك يبغى ينام صاحي من الفجر
الهام/ إنشاء الله
أحمد/ ندى ماأتصلت ... منيره/ الا تسلم عليك
احمد/ ايوه وش اخبارها
منيره/ تقول طيبه .. وانهم توهم واصلين الرياض
أحمد/ ياله يسعدها
منيره / اشوفك ماتفاجئة لما قلتلك انها في الرياض ..انت تدري من قبل انها بتسكن هناك
احمد/ ايوه كنت ادري ..بس ماحبيت اقولكم عشان ماتتضايقون زياده ..بعدين هنا والا هناك اهم شي تكون مبسوطه
منيره / واحنا وش درانا أنها بتكون مبسوطه ..مسكينه تركناها تروح معها واحنا مانعرف خيرهم من شرهم
أحمد / وش فيك أكيد مابيئذونها .. هذولي اهلها
منيره/ وش دراك ..شوف الحين كل يوم نسمع عن اب يذبح بنته واللي يعذبها وهم الي ربوهم ..وش حال هذا اللي مارباها يمكن يطلع زيهم ويسوي في بنتي شي .... مسكت خدودها وكملت /واعليه عنك يابنتي..وجلست تصيح
أحمد/ تعوذي من ابليس إنشاء الله مايصير الاكل خير ..روحي غسلي وجهك وجيبي العشاء واحنا إنشاء الله نروح لها الاسبوع الجاي
منيره/ أمرك
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــ
ياسر/ سحر وش رايك اوديك انتي وسمر بيت عمي عبدالرحمن
سحر/ لا شكراً..بعدين سبحان الله اول مره اشوف اخ يبغى يودي اخواته
فيصل / موعشانك عشان حبيبة القلب ...يعني لوتبغين تروحين استغلي الفرصه
نوره / لا وين تروح الناس الحين بينامون
سمر/ الله يهديك يمه وين ينامون الحين شايفتهم دجاج
فيصل/ ههههههههه حلوه دجاج ..بالله عيديها
سمر/ صدق.. شايفتهم دجاج ..ههههههههه ويدقون يدين بعض
نوره/ اقول روحي ذاكري ناسيه انك توجيهي ..ترى بكره معزومين ع العشاء
سحر/ وين .... نوره/ عند عمك عبدالرحمن ..جاب بنته اليوم وبكره مسوي عزيمه عشان تتعرف على العائله
سمر/ مسكينه خلاص جات
نوره/ لاتقولين مسكينه هي ماجات الأعند اهلها
سحر/ ولو اهلها هي ماتعرفهم ..
ياسر / ياشينكم وانتم تتفلسفون .. تبغن اوديكم والا لا
نوره/ لا يمه روح .......ياسر/ متأكدين خلاص
فيصل /اقول انقلع ...الله لا يبلاني بما بلاك
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــ
في بيت عبدالرحمن....
لميس وعزام كانوا يتضاربون على يد ندى كل واحد يقول أنا بمسكها ..وشوي طاحت دبلتها ووصلت عند رجول فراس
ندى/ لموسه حبيبي جيبيها ..راحت لميس بتجيبها لما جات تاخذها اخذها فراس/ماشاء الله مخطوبه ..يعني ماراح تطولين عندنا ..مين سعيد الحظ
ندى كانت تطالعه بس ماردت *يالفشله حسبي الله عليكم من بزارين ..شرهتكم عاللي يلعب معكم *
فراس/ انا رايح ...... نجاة/ اجلس وين تروح
فراس/ عندي مشوار توي افتكرته.. التفت لندى اللي عيونا عالدبله
وأنتي خذي..بس اضمن لك انكم ماراح تطولون ..لأنك راح تفسخينها
ندى*يمه يخوف ليه يطالعني كذا*/وش اللي يخليكواثق لها الدرجه
فراس/ لأنها عوايدكم يالبنات
ندى/إذا صار هالشي فتأكد انه ماراح يكون مني
فراس / نشوف
مساعد/ خلاص فراس روح لمشوارك
لماراح فراس..نجاة/ واعليه على ولدي كله من الكلبه الله لايوفقها وين ماراحت
عبدالرحمن/ خلاص أنتي لاتقعدين تدعين على خلق الله ...وبعدين ولدك مزودها المفروض ماكبر الموضوع لهالدرجه
نجاة/ الله يهديه
سيتي/ ماما العشاء جاهز
عبدالرحمن/قوموا خلونا نتعشى.. وفراس بيجيله يوم ويعقل
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــ
سمر /سحر ابغى تنورتك الجينز
سحر/ ليش إنشاء الله
سمر/ عندي بلوزه مالقيت شي يناسبها الا تنورتك لذلك فضلاً لا امراً تعطينياها
سحر/ اسفه ماراح اعطيك شي
سمر تبغى تحزنها / طيب ياسحر انا دايم اقول لزميلاتي اختي طيبه إذا طلبتها أي شي تعطينيه ودايم امدح فيك عندهم وهم يحسدوني عليك
سحر/ لا تزعلين بس انت متينه .. توسعينها علي
سمر/ زايده عنك بثلاثه كيلوا وصجيتيني متينه متينه
سحر/ خلاص خذيها شوفيها عندك في الدولاب
دخلت نوره /ماشاء الله وانت وش جابك هنا انا ماقلت روحي ذاكري
سمر/ انا كنت اذاكر بس افتكرت التنوره وجيت اخذها من عند سحر
نوره/ ياله انقلعي ذاكري ولا اجي وانتي عند الدولاب والا ترى مافي روحه بكره
سمر/ لا لا تكفين الا الروحه خلاص بر وح اذاكر والله يفكني من هالدراسه عاجلاً لا اجلاً
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــ
نجاة عبت صحن ندى /ياله حبيبتي كلي شوفي كيف نحفانه
ديمه/ وانا مين يعبي صحني والا خلاص نسيتيني
احلام/ يالله على حركات البزارين
نجاة/ لا مانسيتك هاتي صحنك بس ماراح اعبيه لك لأنك سمنانه زياده اللي يشوفك يقول ماوراها زواج
حنين/ والله من كثر ماهي فرحانه بالزواج
ديمه/ أقول انثبري انتم تعرفون ان وزني يزيد ولا ينقص حتى ولو ماأكلت
عبدالرحمن/ ندى ليه ماتاكلين
ندى / الحمدلله شبعت ..طالعت لسيتي اللي كانت واقفه / وين المغاسل ..ودتها سيتي عند المغاسل شوي ولحقتها حنين ..ندى طولت وهي تغسل
حنين/ما شاء الله كل هذي نظافة ..شوي وتشيلين يدك ..
ابتسمت ندى /لا بس صراحة ما أدري وين أروح ..حنين /ههههههههه تعالي معي ..ليه قمتي بسرعة والا ما عجبك الأكل .. ندى/ لا عجبني بس أنا شبعانة ..حنين/ لاتجاملين أنا عارفة أنه ماعجبك ..بيني وبينك أنا كمان ما عجبني ..تعذرت بالرجيم وقمت ..طبت عليهم أحلام /ليه سكتي كملي شكلك تكذبين على البنت ولما جيت خفتي أكشفك ..بس مكشوفة لأن أرانبك واصلة لأخر الممر
حنين/ههههههه ضحكتيني ..أساساً ما قلت شيء بس سألتها عن رايها في العشاء..ديمه/ تصدقون أني باقي ما شبعت ..بس أمي الله يهديها قومتني بالغصب ..أحلام/أساساً مابقى شيء لحستي الصحون لحس ..بس خليني أقابل ياسر إما علمته عن فجعتك على الأكل
ألتفتت ندى لديمه /أنا تعبانه أبغى أنام ..ديمه/لا بدري خليك معنا باقي الساعة عشرة ..ندى/أنا صاحية من الفجر ولحد الآن ما نمت بصراحة ماني قادرة أفتح عيوني ..ديمه/ يللا تعالي معايه ..نجاة /وين رايحين ..
ديمه/ندى تبغى تنام بوديها غرفتها ..نجاة/زين سويتي روحي أرتاحي ..تصبحين على خير ..أخذتها ديمه وودتها لغرفتها
ديمه/هذي غرفتك وش رايك فيها ترى هذا كله ذوقي وإذا ماعجبتك نغيرها من بكره
كانت روعه عباره عن خليط من الأزرق الفاتح والبني الشوكلايت والأحمر المرجاني وكانت تتميز بديكورات رائعه على رأس وجوانب السرير
ندى/لا حلوه مشكورة ..ديمه طلعت لها بيجامه من الدولاب /خذي هذي البسيها ونامي ..ندى / أوكي ..شكراً
ديمه/تصبحين على خير..ندى/ وأنتي من أهله
ندى شافت شنطتها مركونه على جنب فتحتها وأخذت منها بيجامة ولبستها
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــ
عبد الرحمن /ندى وينها ..نجاة/راحت تنام مسكينه صاحيه من الفجر ما نامت ..عبد الرحمن /يللا نوم العوافي
شذا طول الوقت تدق على جوالات البنات وكانو مطنشينها..أخيراً رحمتها حنين وردت/ألو ..شذا/ليه ماتردون علي من زمان وأنا أدق حرام عليكم ..حنين/شوفيني رديت آمري وش بغيتي..شذا/شفتوها ..
حنين/منهي اللي شفناها ..شذا/ حنينوه لا تستهبلين ندى من غيرها..
حنين/وش رايك أكيد شفناها..شذا/يللا قولي كيف شكلها
حنين/ عادي..خلاص الحين جايين وأقول لك ..شذا/وأنا وش يصبرني الين ما تجون ..قولي الحين بعدين ليه تجون الحين مابتسمرون
حنين/لا خلاص ندى راحت تنام تقول تعبانه ومساعد قال يللا نمشي
شذا/طيب يللا لا تتأخرون ..حتى جدتي صاحيه تنتظر مقهوره زيي ودها أنها راحت معكم ..حنين /طيب يللا باي..شذا/ باي
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــ
ندى في الغرفة لحالها/ياالله فين الهام وجنى أفتكرت كيف كانوا يتضاربون ع الغرفة..
جنى/ياربي متى تتزوجون وتصير الغرفة لي لحالي
ندى/ أقول أسكتي أن شاء الله الهام تتزوج واطردك غرفة الجلوس تنامين فيها ..جنى/ لا والله مابقى الا هيه تطرديني ..إلهام /أقول ريحيني أنتي وياها أنا الكبيرة وأنا اللي بطردكم
*يللا أكلم إلهام أحسن*
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــ
جنى /الهام ماني قادره أنام سولفيلي ..إلهام /نامي عشان تصحين بدري تذاكرين ..ياي هذي ندى تدق ..ألو ..
ندى /هاي ياحلوه وحشتيني..إلهام /وأنتي أكثر..هاه بشري مستانسه
ندى/ والله ماأدري..أحس أني مستحيه منهم ..لما يسولفون يقولون كلام مو مفهوم عاد أنتي عارفه فضولي يشتغل ..والله أمسك نفسي ع النهاية قلت خليني أتأدب هاليومين وبعدين أوريهم ..إلهام /ياليتني عندك..نفسي أشوفك وأنتي مؤدبه أحسه مو لايق ..ندى/لاياشيخه أنا طول عمري مؤدبه..وبعدين المفروض أنك تحترميني ..لأني خلاص رحت من عندكم يعني كني تزوجت بس من دون عريس ..إلهام سكتت شوي ..ندى/هيه وين رحتي ..شكلك تفكرين كيف تحترميني
إلهام بحزن/تصدقين وحشتيني..اليوم ماسولفت مره والله فقدتك ..ندى
*وأناكمان*/ياشيخه خلي حنجرتك ترتاح ماحد سلم من لسانك حسناتك توزعت على خلق الله أنا سويت فيك حسنه يوم رحت عنك المفروض تشكريني ..إلهام/ لا والله..أصلاً ما أفتكر أني قد حشيت في أحد أنا بس أعلمك بأحوالهم ..يللا ماقلتي لي وش سويتي اليوم
ندى/ أنا أقول لك ..
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــ
في بيت أبو تركي ..
الجده/ ماكنهم تأخروا ..شذا/ إيه ياجده والله أنك صادقه لا يكون غيروا رايهم وبيسهرون
أم تركي/ وش فيكم لاتأخروا ولا شيء ألحين جايين سكتت على دخلتهم ..مساعد/ إحنا تعبانين وبنروح ننام ..أحلام وحنين/إي والله وإحنا كمان..الجده/أقول أمش أنت وياها تعالو علمونا ..الكل جلس يضحك رجعوا جلسوا..
الجده/ليه تأخرتوا ..مساعد/رحنا نجيب منى وجينا ..شذا/يللا كي شكلها..مساعد/عادي بنت معها راس وخشم وعيون وفم ..
شذ ا/ يوه ماأقصد كذا ..يعني كيف شفتوها ..مساعد /شفناها بعيوننا..شذا/يا الله لاتخفف دمك ..أقصد أنطباعاتكم عنها ..أحلام /متكبره ماعطتنا وجه ..شذا/ليه ماسولفت..؟!
أحلام/ولا سمعنا صوتها أبداً إلا لما خاصمها فراس ..الجده/ايش خاصمها صدق أنه مايستحي..مساعد /لا ماخاصمها ..ليش تكبرين السالفة ..أروح أنام أحسن ..يللا منى..
لميس / بابا بلوح عند ندى ..مساعد/ خلاص ياحبيبتي بكره نروح ..لميس /لا أبعى الحين ..منى /لا خلاص حبيبتي ندى الحين نامت ..خلينا احنا كمان نروح ننام وبكره نروح..مساعد ومنى/تصبحون على خير
الباقين/وأنتم من أهله ..الجده/ أحلام يللا قولي ليه تخاصموا..أحلام/أبشري يمه أنا أقول لك. .ماخلت صغير ولا كبيره إلا قالتها..
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــ
ندى /أقول إلهام سحبتي رصيدي كله قولي لعبدالله يرسلي بطاقة شحن..وأنا بقفل تعرفين فشله أنا قلت لهم بنام ..تخيلي أحد دخل عليه وأنا أكلم ..إلهام /طيب مع السلامة ..ندى/ مع السلامة
إلهام /أف..ماودي أقفل ..جنى/لا ياشيخه ..لكم ساعه تتكلمون ماكفتك وبعدين ليه ماخليتيني أكلمها ..إلهام/ طيب ماخلصت سواليفي ..أنا قلت إذا خلصت بعطيكيها بس هي قفلت ..جنى/طيب وش قالت لك ..إلهام /أنا أقول لك بس قبل ما أقول ..قولي لي ليش أول ماتبغين تنامين ..وش عندك ..جنى / أنتي عارفه..إن ندى كانت تقول لي الأذكار قبل ماأنام ..اليوم ماهي عندي عشان تعلمني ..صراحة ماأبغى أشوف سريرها أحس أني ببكي..إلهام/لحظه..شوفي ندى تدق ..ألو ..ندى/أعطيني جنى ..إلهام /ليه عسى ماشر ..ندى/مافي شيء أعطينيها..إلهام /طيب ..جنى خذي كلمي ..جنى/هلا ندى ..ندى/ صراحة ماحبيت أنام وأنا ماسمعت صوتك هذا أولاً ثانياً..انا مانسيت اعلمك الاذكار..يللا نبدالأن ماعندي رصيد كثير..
جنى/ شكراً لأنك مانسيتيني يللا نبدا
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــ
صبراص ياعمري لم ترى دمعاً يسيل
سترين معنى الصبر في جسدي النحيل
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــ
ندى طول الليل تتقلب ماهي عارفه تنام على الساعه 3 الفجر حست احد داخل غرفتها تظاهرت انها نايمه ..دخلت نجاة وكانت تصلح الغطاء على ندى ولما شافت وجهها انتبهت لاثار الدموع على خدودها مسحت بيدها على خدها وباستها على راسها وجلست تبكي ..وطلعت وقفلت الباب وراها ..زاد بكى ندى *يالله ليه يصير معي زي كذا يارب ارجوك ساعدني.. ساعدني يارب..والزمني الصبر..ماأبغى ااذي احد معاي ولا اقدر استحمل اجلس هنا *...بعد فتره اخيراً نامت..
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــ
اتمنى ان الجزء الجديد اعجبكم ..وابغىاعرف اش توقعاتكم


مهرة بلا فارس

واااااو واخيرا

الحمد لله على السلامة مهرة وان شاء الله تكوني بخير

لي عودة بعد القراءة